Ginkumpirmar sang himata sang Pilipino nga tripulante nga gin-report nga namissing, nga ini ang sakay sa tugboat nga naigo sang missiles samtang nagabyahe sa bahin sang Strait of Hormuz.
Madumduman nga gindeklarar bilang “Warlike Operations Area” ang Strait of Hormuz humalin sang nag-umpisa nga atakehon sang Iran agud balabagan ang oil shipping bilang pagtimalos sa mga pag-atake sang Amerika kag Israel.
Ginhingadlan ang nadula nga seafarer nga si George Francis Miranda, 46 anyos.
Samtang napahibalo na sang logistics company sa himata sang seafarer kun ano ang natabo sa iya.
Nahibaluan nga nadula ang Pilipino nga tripulante matapos nga maigo sang missile ang UAE-flagged tugboat nga Mussafah 2 sang tinalikdan nga Marso 6.
Ang nasambit nga seafarer ang isa ka motorman kag oiler naggikan sa Capalonga, Camarines Norte nga ulihi nga nakaistorya sang iya pamilya sang tinalikdan nga Marso 5.
