Pila ka mga benepisyaryo sang ayuda para sa bagyo TINO victims ang nagreklamo kag nagbina-isay sa ginpatigayon nga pay-out sang Department of Social Services and Development (DSSD) sa Bacolod City College gym sa Barangay Taculing.
Sa pay out kahapon halos linibo ka mga tawo ang nagpadulong bangod dungan nga ginpanagtag ang ayuda sa mga benepisyaryo sang Brgy Banago, Handumanan, Taculing, Mandalagan, Pta Taytay, Tangub kag Sum-ag.
Sa interview sang Bombo Radyo Bacolod kay Rocena, residente sang Brgy Handumanan, mas maayo kuntani kun ginpaagi na lamang sa kada Barangay ang pay out.
Suno diri, nagkinagamo ang mga tawo sa linya bangod madamo sa mga ulihi nga nag-abot amo pa ang nauna sa validation.
Suno pa diri, bisan nga gab-i na, madamo sa gihapon ang nakapila apisar nga ang iban naghulat alas-8:00 pa lamang sang aga.
