Emosyonal ang Barangay Tanod sa Brgy 23 matapos ginpatay sang iya duha ka bayaw ang iya best friend sa Brgy 22, Bacolod City kagab-i.
Madumduman nga tatlo ang gindakop sa pagtiro-patay kay Ruben Altamira, residente sang Prk Gahili-ugyon, Brgy 23, Bacolod City, nga anay Barangay Tanod kag nagabulante sang tela.
Sa interview sang Bombo Radyo kay Kapitan Johnny Esmil sang Barangay 23, Bacolod City, halos indi siya makapati nga iya pa nga duha ka bayaw ang nagpatay sa iya best friend nga halos pamilya naman ang iya pagkabig.
Suno diri, halin sang soltero sila sang iya kumpare, wala gid ini sang nakontra sa lugar bangod mabuot kag maalwan.
Samtang siya naman ang nagpa-eskwela sa Alternative Learning System (ALS) kay Alyas Jeremy nga nag-ako nga nagtiro kay Altamira.
Ang mga suspect ang ginalakipan ni Jeremy, magulang sini, kag ang isa nga ginapahayag nga ila man bayaw.
Apang nagapati si Roel nga nadalahig lamang ang bayaw sang duha, bangod ini ang isa ka pastor.
Aminado si Roel nga may hangkatanay na nga nagluntad sa tunga sang biktima kag mag-utod bangod lamang sa parking.
Bisan siya ang ginpaandaman man sang iya bayaw nga patyon, apang wala sini ginsapak.
