Naeksperyensyahan ang ashfall sa pila ka mga lugar kasunod sang moderately explosive eruption sang Bulkan Kanlaon alas 6:07 kagab-i, Marso 15.
Santo sa report sang Negros Occidental Operations Center, may yara sang napulo ka mga lokal nga panguluhan (LGU) ang apektado sang ashfall kag may kabug-usan nga 54 ka mga barangay.
Kabahin sa napulo ka banwa kag ciudad amo ang: Binalbagan, La Castellana, Moises Padilla, Isabela, San Carlos, Himamaylan, Kabankalan, Ilog, Hinigaran kag Pontevedra.
Sa karon, may-ara na sang tatlo ka evacuation centers nga gin-okupar sang 44 ka pamilya ukon 147 ka indibidwal.
Dugang pa diri, nagdeklarar man ang pila ka mga LGUs sang class suspension sa pampubliko kag pribado nga eskwelahan subong nga adlaw, nalakip diri ang Binalbagan, La Castellana, Hinigaran, Himamaylan, Isabela, Moises Padilla kag ciudad sang Canlaon.
Ginpahanumdom sang mga otoridad ang pumuluyo nga magsuksok gid sang face mask kag likawan anay ang pagguwa sa balay kun indi man lang kinahanglan.
Ginapangayo man nga mag-report sa Barangay DRRMC, Local DRRMO ukon sa mga lokal nga otoridad kun may mabatyagan nga ashfall ukon iban pa nga emerhensiya.
Sa subong, yara gihapon sa Alert Level 2 ang bulkan.
