Wala pa sang mga mananagat sa Barangay Banago, Bacolod City ang nagpadulong sa Barangay Hall para mamangkot kun may ayuda nga mahatag sa ila.
Sa interview sang Bombo Radyo kay Punong barangay Arnel Benjamin, wala pa man sang may nakapalapit sa iya nga mananagat agud mamangkot kun may yara sila nga makuha nga ayuda.
Suno diri, nagsaka na ang presyo sang produktong petrolyo amo man nga nagsaka ang presyo sang isda.
Suno kay Benjamin, ginakakibot pa sang mga manugbakal ang saka sa presyo sang isda kun sa diin ang lagaw nga anay nagabalor sang P350, sa karun nangin P450 na tubtob P550 ang kilo, ang lokus nagabalor naman sang P330 nga anay P280 sadto samtang iban nga isda nga sadto nagabalor sang P200 sa karun nagsaka na sa P300 tubtob P400.
Apang, ginapa-intindi na lamang nila nga nagmahal na ang krudo amo nga wala sila sang may mahimo kundi pasakaon man ang presyo sang isda para makaginansya man sila.
Pahayag ni Benjamin, hulat-hulaton anay nila kun may ihatag ang gobyerno apang kun wala, nakita naman sini ang batasan sang pumuluyo nga nagapadayon sa gihapon sa ila pang-adlaw adlaw. Samtang, halos isa na ka semana nga wala nakapanagat ang isa ka manugpangisda matapos maguba ang iya sakayan pandagat kag wala pa ini sang kwarta nga ipatughong.
Sa interview kay Arjon Magalso, masobra duha ka dekada na ini nga nagapanagat kag sa karun pa lamang siya naka-eksperyensya nga tuman ang pagsaka sang krudo.
Suno diri, may yara siya sang duha ka bata nga magagmay pa kag wala sila sa karun sang iban nga palangabuhian magluwas sa iya nga pagpangisda.
Pahayag ni Magalso, wala man siya sang may mahimo kundi agwantahon ang kabudlayan kag magpadayon sa pagpanagat.
