Ginbalik na sang Vallacar Transit Incorporated ang ila regular nga fare rate matapos mabatun ang sulat gikan sa Land Transportation Franchising and Regulatory Board tuhoy sa kanselasyon sang fare increase.
Madumduman nga una na nga nagpasaka sang pletehan kag nagpagwa sang bag-o nga fare matrix antes paman ang implementasyon sang aprubado nga fare increase nga kuntani maga-umpisa subong nga adlaw.
Apang kahapon sang hapon, hinali nga nag-anunsyo si President Ferdinand “Bongbong” Marcos sa pagsuspender sang fare hike.
Una na nga nagpahayag si Jade Marquez, media relations officer sang Vallacar Transit Inc. nga magabalik lamang sila sa orihinal nga pletehan kun makapagwa na sang official announcement ang LTFRB.
Sa interview sang Bombo Radyo Bacolod kay Marques subong nga adlaw, nabatun nila kaina sang aga ang sulat gikan sa LTFRB, kag sila ang gilayon man nga nagsunod.
Panugyan sini sa mga pasahero nga kun ang konduktor ang magsukot gihapon sang mas mataas nga plete, ipahanumdom sang mga ini nga ginkanselar ang fare hike.
Apang kun magpamilit gid ang konduktor, panugyan sini nga tandaan ang body number sang Ceres bus nga ginsakyan, taguon ang ticket kag ireport pagdangat sa terminal.
Suno diri, kinahanglan nga makita sa ticket nga mas mataas sa regular nga plete ang ginsukot, agud mangin basihan sa masunod nga mangin tikang sang kompanya.
Pasalig ni Marquez nga ipatawag nila ang konduktor kag driver agud ma-imbestigahan kag mapangayuan sang rasun sa pagsukot sang mas mataas nga pamasahe.
