Babayi, ginhimo palangabuhian ang paghakos; Nagasukot sang halos P10,000 kada oras

Bisan sin-o sa atun ang nagapangita man sang opportunidad nga makahatag sa atun sang income agud nga makapangabuhi sang matawhay.

Kaangay lang sa isa ka babayi sa New York nga ginhimo palangabuhian ang paghakos.

Siya si Ella Love, 51 anyos nga isa ka anay manunudlo sa sulod sang 13 ka tuig sa New York public schools.

Sa kada isa ka oras nga paghakos, nagapabayad sia sang $150 ukon halos P10,000.

Sa isa ka tuig, nagaganar si Love sang tubtob $100,000 ukon masobra P6.3 million.

Suno sa iya, kalabanan sa iya mga kliyente ang mga lalaki nga kasado, may maayo nga trabaho apang wala sang intimacy sa ila panimalay.

Gin-athag ni Love nga physiological response lamang ang iya ginatanyag paagi sa pagkupo kag wala na sang iban nga serbisyo.