Isa ka oras lamang ang ginpatigayon nga protest rally sa pagpanguna sang transport group nga United Negros Drivers and Operators Center (UNDOC-PISTON) sa North Bound Terminal sa Bacolod City.
Ang aktibidad ang ginsuguran alas-9:30 sang aga kag natapos alas-10:30 sang aga.
Wala naman sang untat-byahe nga ginpatigayon.
Sa interview sang Bombo Radyo Bacolod kay United Negros Drivers and Operators Center (UNDOC-PISTON) Secretary General Eric Bendoy, ini ang ila paagi sa pagsuporta nationwide transport strike nga panawagan sang National Transport Group nga PISTON.
Nagdangat sa 150 ang nag-upod nga kalabanan mga drivers kag operators, kag pila ka mga commuters kaangay sang mga katapo sang Kabataan-Negros, Bayan-Negros kag Kilosang Mayo Uno.
Suno kay Bendoy, sadto P700 ang ginatughong sang mga drivers apang sa karun ang kaangay nga kadamuon sang gatong ang nagabalor na sang P1,400 tubtob P1,500.
Pahayag sini nga doble ang ginsaka sa presyo, nga nagakahulugan nga tuman man ka dako ang nagakadula sa income sang mga drivers nga madala kuntani sa pamilya.
Suportado nila ang nationwide nga panawagan sa pagsuspender sang fuel excise tax kag 12 percent nga value added tax sa fuel products.
Nagapati man ini nga bisan ang alkalde ang may ikasarang sa pagpagwa sang ordinansa nga makaregulate sang presyo sang basic commodities kalakip na ang gatong.
Apang imbes nga buligan, ginalantaw sang mga ini nga sila ang ginapahipos paagi sa paghatag sang ayuda.
Paathag ni Bendoy nga indi tanan ang maka-avail sang fuel subsidy, bangod madamo sang wala na gintugutan nga makarenew sang prangkisa.
Suno diri, kun padayun nga magsaka ang presyo sang gatong, sila upod sa iban pa nga mga transport group ang mapilitan nga magpatigayon sang untat-byahe.
