May nagaluntad na nga kinawatay sang gatong sa isa ka subdivision sa Barangay Mansilingan, Bacolod City.
Sa interview sang Bombo Radyo Bacolod kay Bacolod Alliance of Commuters, Operators, and Drivers (BACOD-Manibela) President Rudy Catedral, ginapapark sini ang iya nga jeep sa kilid sang dalan sa Hermelinda Homes Subdivision sa Brgy Mansilingan.
Antes ginparada, may three-fourth pa nga unod nga diesel ang tangke sang iya nga jeep, apang nakibot na lamang ang iya driver kaina sang aga nga ini ang indi na mag-andar.
Didto na nila nakita nga hubas na ang tangke, kag ginbuksan ang valve sa idalom.
Ginbilin pa sang kawatan ang galon nga ila nga gingamit.
Siya ang nagpablotter naman sa Bacolod Police Station 7.
Suno kay Catedral, madamo man sang mga residente nga nagpahayag nga madamo na sang nabiktima sang pagpangawat sang gatong sa nasambit nga subdivision.
Ginalantaw sini nga ini ang epekto na sang kapigaduhon kag tuman nga pagsaka sang presyo sang gatong.
Apang kaangay sa ila nga nagapaninguha sa gihapon, pangabay sini nga amo man ang himuon sang iban kag indi magpakahapos paagi sa pagpangawat.
Panawagan man sini kay Bacolod City Police Office Director Police Col Eugene Rebadomia nga pasanyugon pa ang police visibility.
Sa pihak sang kinawatay, nagapati si Catedral nga indi mag-abot ang tion nga himuon man sang mga Jeepney drivers ang kaangay sa natabo sa gas station nga ginpalagyuhan sang nagpatughong nga salakyan.
Pahanumdom sini nga antes paman ginbawi ni President Ferdinand Marcos Jr ang pagpatuman sang fare hike, sila ang nagapanindugan na nga indi magpasaka sang pamasahe basta may-ara lamang sang bulig gikan sa gobyerno.
