Ginapaabot na sang Vallacar Transit Incorporated ang pagdagsa sang mga byahero sa mga bus terminal subong nga hapon tubtob sa gab-i.
Sa interview sang Bombo Radyo Bacolod kay Jade Marquez, media relations officer sang Vallacar Transit Inc., kaina sang aga matawhay pa ang sitwasyon sang bus terminal.
Apang sa ila nga ginabasihan nga trend santo sa mga nagliligad nga Semana Santa, sa masami sa ikaduha nga adlaw sang Holy Week nagadagsa ang mga nagabyahe.
Ang dagsa sang mga pasahero ang masami naga-umpisa alas-4:00 sang hapon tubtob na maggab-i.
Suno kay Marquez, bangod sa kadamuon sang pasahero, indi na masunod ang regular dispatching sang Ceres buses nga sa masami may oras nga ginasunod.
Sa baylo, magalarga na lamang gilayon ang bus kun mapuno na ang sitting capacity.
Samtang Dominggo sa hapon tubtob Lunes sa aga naman ang ginalauman nga pagbalik sang mga pasahero.
May pila naman ka mga adjustment sa schedule sang byahe nga ila naman napost sa ila social media page.
