Ginpasanyog sang Philippine Coast Guard (PCG) Northern Negros Occidental ang ila kampanya para sa seguridad sang mga byahero pinaagi sa pagpatuman sang “iCARE” ukon Intensified Community Assistance Awareness, Response, and Enforcement Program.
Sa interview sang Bombo Radyo Bacolod kay Lieutenant Junior Grade Richelito L. Arbis, Deputy Commander sang Coast Guard Station Northern Negros Occidental, ginlunsyar ini nga programa agud pabaskugon ang proteksyon sa mga commuters ilabi na gid sa peak season sang Semana Santa.
Suno kay Arbis, kabahin sang iCARE program ang pagbutang sang Passenger Assistance Centers kag “Malasakit Help Desk” sa mga pantalan agud maghatag assistance sa mga pasahero.
Dugang pa niya, ginpahamtang man sang PCG ang paggamit sang QR code system para sa “e-Sumbong” ukon digital nga pagreport sang mga concern.
Pinaagi sini, madali na makapahibalo ang publiko kun may makita sila nga irregularidad ukon problema sa pantalan kag mga sakayan.
Ginapanugyanan man ang mga pasahero nga likawan ang pagdala sang mga ginadumilian nga mga butang kaangay sang patalom, gunting, ilegal nga droga, kag pusil agud malikawan ang ano man nga insidente samtang naga-biyahe.
Ginpabutyag sang PCG nga pinaagi sa sini nga tikang, mangin mas malinong, organisado, kag luwas ang pagbiyahe sang publiko, ilabi na gid sa ginapaabot nga madamo nga pasahero sa Easter Sunday.
