Magahiwat ang United Kingdom sang isa ka virtual meeting sini nga Biyernes agud ma-istorhayan ang pagtukod sang coalition sang mga pungsod nga magpangita sang pamaagi agud liwat nga buksan ang Strait of Hormuz.
Ini matapos magpahayag si U.S. President Donald Trump nga responsibilidad sang iban nga pungsod ang seguridad sa nasambit nga pantalan.
Pangunahan ni British Foreign Minister Yvette Cooper ang pakighinun-anon nga pagatambongan naman sang mga pungsod kaangay sang France, Germany, Italy, Canada, kag United Arab Emirates, samtang indi naman magtambong ang Estados Unidos.
Tinutuyo sang meeting nga diskusyunan kun paano mabalik ang luwas nga paglabay sang mga barko sa rehiyon.
Madumduman nga ginsirado sang Iran ang Strait of Hormuz bilang sabat sa mga ginhimo nga pag-atake sang U.S. kag Israel nga nag-umpisa sa tinalikdan nga Pebrero 28, 2026.
Suno kay British Prime Minister Keir Starmer, pagatun-an sa diskusyon ang tanan nga diplomatiko kag politikal nga pamaagi agud mabalik ang kahilwayan sa Hormuz Strait, ilabi na kun mapatigayon ang ceasefire.
