Ginkakibot sang mga residente sang Barangay San Miguel sa Palo, Leyte ang nakit-an nga kaangay nawong ni Hesus sa isa ka pader matapos ang pag-ulan.
Iban nagpati nga isa ini ka himala, apang lain naman ang pag-intindi sang mga eksperto.
Suno sa nag-upload sang video nga si Caryl Del Carmen, madamo sang tawo nga nag-untat, nangamuyo, kag nagsindi sang kandila sa idalom sang pader.
Suno diri, duha ka oras lang nakit-an ang imahen ni Hesus apang madamo sa gihapon ang nagapadulong sa lugar.
Apang, gin-athag sang Simbahan nga indi pwede nga ideklarar gilayon nga aparisyon ukon himala ang natabo nga wala sang matul-id nga imbestigasyon apang wala naman sang malain kun magsindi sang kandila bangod nakadepende ini sa interpretasyon sang tawo sa iya nakita.
Samtang, suno naman sa mga eksperto, mahimo nga halimbawa ini sang psychological phenomenon nga “pareidolia”.
Sa pareidolia, nakakita ang tawo sang isa ka pamilyar nga korte ukon hitsura sa mga random nga pattern.
Suno sa psychiatrist nga si Randy Dellosa, mahimo masimplify nga ang pareidolia kaangay sa ilusyon.
Kaangay na lamang kun may makita nga landong sa pader ukon may makita nga nawong sa pagkaon ukon may makita nga korte sa panganod.
Suno diri, kun Semana Santa, mas bukas ang paminsaron kag balatyagon sang mga tawo sa mga espiritwal nga experience amo nga mas sensitibo ang tawo sa ini nga mga butang.
