Nagpahanumdom ang Bacolod City Police Office sa mga magaupod sa transport strike nga respetuhon ang iban nga drivers nga indi mag-upod kag magasige sa pagbiyahe subong nga adlaw.
Sa interview sang Bombo Radyo Bacolod kay Police Lt Col. Lester Leada, Bacolod City Police Office Deputy City Director For Operations, nagakahangop sila sang luyag nga ipalab-ot nga mensahe sang mga drivers nga magaupod sa transport strike.
Suno kay Leada nakahibalo sila sang sitwasyon sang kamahalon sang gasolina sa karun kag sila kasubong man ang pamilya sang mga ini ang apektado man.
Apang pahanumdom sini nga himuon lamang ini nga may pagrespeto.
Samtang may yara man sang tatlo ka platoon sang mga kapulisan nga magaassist sa Libre Sakay sang Bacolod City Government.
Dugang pa sang Bacolod City Police Office Deputy City Director For Operations nga ang mga police patrol car mahimo man makaassist sa mga apektado nga pumuluyo sang transport strike agud nga makalab-ot sa ila destinasyon nga sa sulod lamang sang ila tagsa ka Area of Responsibility.
