Patay ang tatlo ka High Value Individual kalakip ang isa ka drug group leader sa engkwentro batok sa otoridad sa Sitio Napulangan 2, Brgy Jonob-jonob, Escalante City.
Ang mga napatay ang ginalakipan sang ginakabig drug group leader nga si Joseph Moso Bindoy; kasubong man sanday Piolo Morning Regodos, residente sang Brgy Malasibog kag Roy Bagayo Manija Jr., residente sang Brgy Jonob-Jonob, Escalante City, samtang may isa naman nga nasamaran kag yara sa karun sa ospital.
Sa interview sang Bombo Radyo Bacolod kay Police Lt Col Florendo, hepe sang Escalante City Police Station, ang operasyon ang ginpangunahan sang PDEA NIR upod sa pila ka units sang kapulisan kag 79th Infantry Battalion sang Philippine Army.
Ginapahayag nga si Bindoy ang may duha ka pending warrant angot sa illegal nga droga, kun sa diin isa diri ang wala sang pyansa; kasubong man may pending warrant sa illegal nga paghupot sang armas.
Suno kay Florendo, nabudlayan sila sa paglagas kay Bindoy bangod ini ang nagpasaylo saylo sang balay, tubtob nga nacorner nila sa ika-anom na nga balay kun sa diin ini ang nagbato kapin alas-2:00 kahapon sang hapon.
Ini ang madamo pa sang kaupdanan, kag ang bayluhanay sang lupok ang naglawig sang masobra isa ka oras.
Napatay si Bindoy kag nakita sa iya ang isa ka M16 A1 rifle nga may magazine nga naga-unod sang 23 ka live ammunition, kasubong man ang 13 ka sachet sang suspected shabu nga may standard drug price nga P88,400.
Alas-7:00 sang gab-i, nasapwan naman ang bangkay sang duha pa, nga mahimo nahubsan sang dugo.
Ginreport naman nga may-isa nga gindala sa ospital bangod sa igo sang bala, kag sa karun yara na sa idalom sang house arrest.
