Wala pa makilal-an kun sin-o ang ginikanan sang bag-ong bun-ag nga lapsag nga lalaki nga ginbilin sa bypass road, Hda Bernabe, barangay Salvacion, sa banwa sang Murcia.
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, wala sang may nakakita kun sin-o ang nagbilin sa lapsag bangod madulom ang area apang nagkoordinar na sila sa mga barangay sa banwa para mabacktrack kun sin-o ang ginikanan sang bata.
Apang, nagapati si Labaro nga indi residente sang banwa ang mga ginikanan bangod sadto may yara sang mga bangkay nga nagakasapwan sa lugar kag ang mga biktima indi taga banwa sang Murcia.
Madumduman nga ang lapsag nasapwan sang tatlo ka lalaki nga nagapangita sang damang.
Ini nasapwan nga nagahapa kag naputos sang bayo.
Gilayon naman nga nagtawag sang police ang mga nakakita sa lapsag kag ang personnel sang Municipal Health Office pa ang nag-utod sang umbilical cord.
Pahayag ni Labaro, ginapangabay sini nga mapaminsaran sang iloy sang lapsag ang iya ginhimo bangod ang bata wala sang kalabot-labot sa kun ano man ang problema sang ginikanan kag kun tani mangin responsable ang iloy kag amay sini.
