Ginsettle na sang ginikanan sang driver nga nagpatughong apang nagpalagyo nga wala nagbayad ang gasolinahan kasubong man ang ginrentahan sini sang car-for-rent.
Nahibaluan nga natumod nga isa lamang ka salakyan ang narecord nga nagahimo sang “Tughong and Run” sa Total gas station sa Brgy Taculing sang Abril 15 kag sa Orient gas station sa Talisay City kahapon sang aga, Abril 17.
Ginabanta nga masobra P6,000 ang balor sang gintughong sini sa Brgy Taculong, kag nagfulltank naman sa masobra P7,000 sa Talisay City.
Sa interview sang Bombo Radyo Bacolod Police Major Rhazl Jim Jocson, Deputy Chief of Police sang Talisay City Police Station, natumod sang ila imbestigador nga isa lamang ka salakyan ang nakuhaan sa CCTV footage nga puti nga Nissan Terra, apang ini ang ginapa-rent a car sang tag-iya.
Gilayon man nga natumod kun sin-o ang nag-arkila, nga isa ka lalaki nga yara sa 30s ang edad, residente sang Brgy Tangub, Bacolod City.
Nag-atubangay ang ginikanan sang driver sa management sang fuel station sa Talisay kasubong man sa car-owner kag didto na ginpatigayon ang settlement.
Ginbayaran sang ginikanan ang fuel station sa Talisay kasubong man ang rent-a-car, apang wala pa matumod kun nabayaran man ang fuel station sa Brgy Taculing.
Suno kay Jocson, wala na nahibaluan ang rasun sang driver sa pagpalagyo bangod madasig lamang ang pagbayluhanay sang bayad, kag nagfile naman gilayon ang fuel company personnel sang affidavit of non-interest to file a case.
