Makabig nga isa ka dako nga “comeback” sa banwa sang Isabela matapos makoronahan bilang kampeon sa Best of Festival Dance Competition (Municipal Category) sa ika-30 nga Panaad sa Negros Festival sang Abril 14.
Ang Tigkalalag Festival ang gintukod sang Nobyembre 2, 2008 bilag pagpasalamat sa kabuhi kag paghatag dungog sa mga minatay.
Apang sang 2013, ini ang gin-untat kag gin-buslan sang Panubli-on Festival.
Nabuhi ini liwat sang administrasyon ni Mayor Miguel Angelo Yulo sang 2025 agud ibalik ang identidad kag kultura sang mga Isabeleño.
Sa interview sang Bombo Radyo kay Dexter John R. Arricivita, Artistic Director sang Tigkalalag Festival sang Isabela, matapos ang 18 ka tuig nga wala sila kapartisipar, gintinguhaan gid nila nga masiguro ang pwesto sa kompetisyon kag nagpasalamat sa ila kadalag-an.
Suno kay Arricita, dako ang bulig sang Local Goverment Unit sang banwa nga naghatag sang bug-os nga suporta agud mangin manami ang ila performance sa Panaad stage.
Paathag sini, ang ila presentasyon ang nagatutok sa mga tradisyon nga ginahimo sa patyo sa tion sang Tigkalalag sa Nobyembre 1 kag 2.
Ang grupo ang nakabaton sang P120,000 nga cash prize.
Para kay Arricivita, ang ila pagtinguha sa pag-perform ang indi lamang para sa ila kaugalingon kundi para gid sa banwa.
Paathag sini, ini ang ila ginahimo agud mabutang ang Isabela sa tourism map kag mabalik sa LGU ang legacy nga magapadayon sa masunod nga henerasyon.
Pahayag ni Arrcivita nga padayon sila sa pagtinguha agud nga mapabilin ang ila kadalag-an sa masunod nga mga kompetisyon.
