Nag-atubang na kahapon, Abril 24, sa Sandiganbayan ang State witness nga si anay Department of Public Works and Highways (DPWH) USec. Roberto Bernardo.
Madumduman nga wala nakatambong sa bail hearing kahapon si former Senator Ramon Revilla Jr kag ang iya mga kaupod nga akusado bangud nagamasakit ini, base sa kumpirmasyon sang resident doctor sang anti-graft court.
Sa testimonya niya sa korte, ginbuyagyag ni Bernardo ang ginpahayag tatlo ka cash delivery kay Revilla.
Suno sa iya, personal niya nga gindul-ong ang una nga anum ka kahon kag isa ka paper bag nga may unod nga P125 million sang Disyembre 2024, sa diin kaupod niya ang iya driver nga si Isko Dela Fuente.
Sang Pebrero 2025, ang iya aide nga si Niño Garcia ang nagdul-ong sang 13 ka mga kahon ukon bankers box nga nga nagaunod P250 million.
Samtang, ang ikatatlo nga cash delivery ang natabo sang Marso sang nagligad nga tuig, sa diin personal niya nga gindul-ong ang dugang nga P125 million nga nasulod sa anum ka kahon.
Ang nagapadayon nga bail hearing ang may kaangtanan sa kaso nga malversation nga ginapangatubang ni Revilla kag sang lima ka iban pa nga mga kaupod nga akusado may kaangtanan sa ghost flood control project sa Pandi, Bulacan.
