Ginkumpirmar ni Interior Secretary Jonvic Remulla kahapon nga may koneksyon ang manufacturing sang illicit cigarettes sa Bago City kag ang operasyon sang illegal e-sabong operation sa Talisay City.
Nahibaluan nga nagbisita kahapon kag nagpatigayon sang press conference sa Remulla sa nagaserbe nga factory sang peke nga sigarilyo sa Brgy Calumangan, Bago City kun sa diin kalakip ang 10 ka Chinese nationals sa naaresto.Samtang sang Huwebes sang gab-i, 30 man ka persona ang naaresto sa pag-operate sang online sabong cockpit sa Brgy Concepcion, Talisay City.
Suno diri, sa online platform nagagwa nga gikan sa iban nga pungsod ang operation bangod may mga Vietnamese kag Thai langauge nga nabutang, apang ini ang natumod nga sa Talisay City lamang ginapatigayon.
Dugang pa nga ang gintumod ni Remulla nga Police Major nga assigned sa Bacolod City apang indi personnel sa Bacolod City Police Office, nga nagaserbe nga protektor sang illicit cigarette manufacturing, amo man ang tag-iya sang cockpit nga ginagamit sa e-sabong.
Nahibaluan nga sa cockpit ginadala ang madamo sa mga ginakawat nga pangbulang nga manok sa Negros, nga ginabakal kag ginagamit sa e-sabong operation.
Suno diri, nagadangat sa P5 million ang net income sang mga ini sa kada adlaw.
Sa operasyon, 290 ka pangbulang nga manok ang narecover.
Una naman nga ginpahayag ni Talisay City Mayor Rowena Lizares, nga konektado si Atong Ang sa e-sabong operation, apang suno naman kay Remulla wala pa nakagwa ang pangalan sang wanted nga negosyante sa nabatun sini nga impormasyon.
Apang bangod konektado ang duha ka illegal nga operasyon, ini ang gintawag ni Remulla nga large criminal syndicate enterprise.
Gindayaw man sini ang accomplishment sang mga operatiba sa Negros Island Region.
