Nakahanda na ang Bacolod City Police Office (BCPO) sa patigayunon nga rally sang nagkalain-lain nga grupo kadungan sa Labor Day bwas, Mayo 1.
Sa interview sang Bombo Radyo kay PCol Eugene Rebadomia, Officer in Charge sang BCPO, tatlo ka grupo ang nagkuha sang permit para sa rally lakip diri ang Makabayan kag Kilusang Mayo Uno (KMU).
Pahayag sini nga ginatugutan sang kapulisan ang mga grupo nga magpatigayon sang rally para sa ila mga singgitan sa gobyerno basta indi lang ini magtuga sang kinagamo sa dalanon.
Ginalauman ni Rebadomia nga masobra 600 ka mga miyembro ang maga-upod diri kun sa diin sila ang magatipon sa Public Plaza.
Nagpasalamat ini sa mga organizer sang rally sa pagsunod sa kun ano ang nakabutang sang ila permit kag sa pagkoordinar sa kapulisan.
Pasalig sini nga ang kapulisan ang magahatag sang seguridad sa dalanon agud indi makatuga sang huol sa trapiko.
