Nakit-an na kaina sang aga ang bangkay sang 45 anyos nga lalaki nga naglumpat gikan sa isa ka Roll-on Roll-off (RoRo) vessel sa kadagatan sang Sipaway, Island sa San Carlos City, Negros Occidental tinalikdan nga Abril 24.
Sa interview sang Bombo Radyo Bacolod kay Coast Guard Ensign Denden Flores, Commander sang Coast Guard Substation San Carlos, nakita na kapin alas-5:00 kaina sang aga ang bangkay ni Jessie Pataytay Rubin, 45 anyos, residente sang General Luna, Sagay City, Negros Occidental.
Suno diri, ang bangkay ang nakita sang mananagat nga si Benjie Latag sang Brgy San Juan malapit sa Sipaway Island.
Ang bangkay ang nagakaya nga naga-utaw utaw sa dagat kag bloated na ang lawas.
Nag-itom na ang nawong sang bangkay, apang ini ang nakilal-an bangod sa panapton subong man bangod sa sling bag nga nakahigot sa iya lawas.
Suno kay Flores, ang sling bag nga suksok sini amo man ang sling bag nga makita sa CCTV footage sang ini ang yara sa ticketing office.
Sa pagbukas sang bag, yara pa didto ang birth certificate sang biktima, mga litrato sini, kasubong man litrato sang iya mga utod.
Ginapahayag nga ini ang magatabok kuntani padulong sa Cebu para magtrabaho.
Aminado man ang pamilya nga may ginasuprer nga depresyon si Rubin, apang naga-abot abot lamang.
Ang bangkay ang gindala sa St. Francis Funeral Homes sa San Carlos City, kag diri na lamang igahaya.
Nadesisyonan naman nga sa San Carlos City Public Cemetery na lamang ilubong ang biktima bwas, bangod ini ang may tiya man kag mga himata sa ciudad sang San Carlos.
