“Salbara nalang ang kaugalingon mo” – ulihi nga ginhambal sang senior citizen sa iya bana, antes mapatay sa sunog sa Brgy Alijis, Bacolod City

Patay ang senior citizen nga babayi sa nagluntad nga sunog sa Prk Maanyag 2, Brgy Alijis, Bacolod City pasado alas-10:00 kagab-i.

Sa interview sang Bombo Radyo Bacolod kay Judy Baradas, ang ila nga kaingod nga si Rosa Magbanua, masobra 70 anyos, ang wala nakaluwas matapos matrap sa ila nga balay.

Pahayag sini nga nagtinguha pa nga makagwa sa balay ang biktima upod sa iya bana nga kilala lamang sini bilang Tatay Aming.

Suno kay Baradas, bangod nakakandado ang ila nga balay, nagtaklas ang bana kag dawaton kuntani sini ang asawa.

Apang naghambal na lamang ini sa iya bana nga “salbara nalang ang kaugalingon mo” kag nagbuya sa kamot sang iya bana.

Naghingagaw naman dalagan ang bana agud mangayo sang bulig, apang bangod human sa light material ang ila nga balay kag may trapal pa sa gwa, ini ang madasig nga gintupok.

Sa pagbalik ni Tatay Aming, natupok na ang ila nga balay, kaupod sa iya nga asawa.

Suno pa diri, kalakip man sa nasunog ang ila balay.

Suno kay Baradas, sa pagsulod pa lamang sini sa main door sang ila balay, nakita sini nga dako na ang kalayo gikan sa iya nga kwarto.

Ginapakamaayo man sini nga siya ang nagpauli agud magdul-ong sang sud-an bangod yara lamang nagatulog sa ila balay ang iya duha ka hinablos nga kabataan.

Gilayon ini nagsinggitan sang tabang, samtang ang iya mga hinablos ang ginbutong naman sang bana sang iya magulang paggwa sa balay.

Panidugan sini nga sila ang wala kuryente kag wala man sang may ginsindihan nga katol, apang sila ang may battery nga gina-angtan sang suga.

Ini man sini maseguro kun sa ila balay nag-umpisa ang kalayo apang nagdangat sa apat ka balay ang nasunog, kalakip sang isa ka partially damaged.

Dutayan man ini masamaran bangod sa hana sini nga pagsulod sa ila balay, hinali nga naglupok ang ila nga butane.

Ang kalayo ang napalong pasado alas-12:00 na sang kaagahon.