Isa ka tumalagsahon nga hitabo ang naeksperyensyahan sang isa ka studyante matapos mangin classmate sini ang iya mga ginikanan sa isa ka technical course.
Ginpakigbahin ni MJ Reginaldo sa iya social media ang ila pinasahi nga family bonding—ang dungan nga nagasulod sa klase sa idalom sang TESDA.
Suno kay MJ, mahilig ang amay sini sa pagrepair sang mga wiring sang salakyan.
Bangud diri, napinsaran sang iya amay nga mag-enroll sa automotive wiring class, kag gin-agda pa ang iya asawa kag si MJ nga bag-o lang nag-graduate sadto.
Sa una, gin-ako ni MJ nga nakabatyag ini sang gamay nga kahuya sa ila nga sitwasyon.
Sin-o man bala ang indi makibot kun ang imo seatmate sa classroom amo ang imo amay kag iloy?
Apang, sa ulihi, nabaylohan sang kalipay kag kinadlaw ang sitwasyon sang ila pamilya.
Suno kay MJ, mas nangin mag-an ang pagtuon bangud sa presensya sang iya ginikanan, kag nagserbe pa ini nga oportunidad para sa mas mapag-on nga pag-inupdanay sang iya pamilya.
