Patay ang 16 anyos samtang pilason naman ang duha ka iban pa matapos makabunggo sa isa ka dump truck ang tatlo ka motorsiklo nga gina-alegar nagadrag racing sa New Economic Highway sa Prk Badiang, Brgy Sum-ag, Bacolod City pasado alas-9:00 kagab-i.
Ang napatay ang ginkilala nga si Louiege Paminsaran, 16 anyos; samtang ang duha ka nasamaran ang ginkilala nga sanday Alyas RR kag Jerrymi, lunsay mga residente sang Brgy Tabunan, Bago City.
Sa interview sang Bombo Radyo Bacolod kay Police Major Elmer Bonilla, head sang Traffic Enforcement Unit sang Bacolod City Police Office, ang tatlo ka motorsiklo ang gina-alegar nagapalumba sa East to West nga dereksyon.
Samtang ang dump truck nga ginamaneho ni Romie Santander, 58 anyos, kasado, residente sang Brgy San Roque, Hinigaran.
Sa natipon nga impormasyon, ginapahayag sang mga nakakita nga madasig ang dalagan sang tatlo ka motorsiklo, kun sa diin ang mga driver ang naga-superman na sa pagpadalagan.
Pagdangat sa intersection, magaliko kuntani ang dump truck, apang bangod madasig ang dalagan sang tatlo, wala ang mga ini gilayon nakaprino kag nagbunggo sa natuo nga bahin sang dump truck.
Bangod wala sang helmet, si Louiege ang nag-agom sang patal nga samad sa ulo kag mga bali sa kalawasan; samtang nagsuhot naman sa dump truck ang motorsiklo ni RR; samtang natumba sa dalan si Jerrymi.
Suno kay Bonilla, gindala sa ospital si RR, apang si Jerrymi ang gilayon nga nalagyo matapos ang aksidente kag ginbiyaan sini ang iya motorsiklo.
