Natalana nga pasakaan sang kaso subong nga adlaw ang mag-iloy nga sanday Edward kag Delia Acupan paagi sa inquest proceedings.
Ini matapos magbato ang subject person nga si Edward sa mga kapulisan nga nagresulta sa pagkapatay ni Police Master Sergeant Davy Carampatana kag pagkapilas sang duha ka mga pulis nga sanday deputy chief of police sang La Castellana Municipal Police Station nga si Police Captain Michael Muñez kag PCpl Gerson Guache, sa ginpatigayon nga drug buybust operation sa Sitio Talaptap, Brgy. Talaptap, La Castellana sang tinalikdan nga adlaw.
Sa interview sang Bombo Radyo Bacolod kay NOCPPO Spokesperson Police Captain Judesses Catalogo, ginadihon na ang pagpasaka sang patong-patong nga kaso kriminal batok sa mga suspetsado kalakip ang Homicide, Frustrated Homicide, Physical Injuries, Direct Assault, kag paglapas sa RA 9165 ukon Comprehensive dangerous drugs act of 2002.
Sa karon, nakahunong na ang mga suspetsado samtang ginahanda ang tanan nga dokumento para sa pormal nga pagpasaka sang kaso.
