Nagpasaka na sang mga reklamo nga slight illegal detention, unlawful arrest, kag physical injuries sa Makati Prosecutor’s Office kahapon, Miyerkules ang anay driver sang aktres nga si Rhian Ramos batok sa iya nga anay amo kasubong man kanday Michelle Dee kag Samantha Panlilio bangud sa ginaalegar pagpanakit sa iya sang tinalikdan nga Enero.
Ang complainant nga ginkilala nga si “Totoy,” kaupod ang abogado sini kag Volunteers Against Crime and Corruption (VACC) president nga si Arsenio Evangelista, ang nagpadulong sa Homicide Division sang National Bureau of Investigation para sa isa ka briefing antes ang pormal nga pagpasaka sang kaso sa talatapan sang piskal sa Makati.
Suno kay Evangelista, apat na ka bulan matapos ang ginaalegar insidente antes ma-fiel ang kaso bangud sa ginpatigayon nga maid-id nga case build-up sang NBI.
Suno diri, kumpyansa sila nga mangin mabaskog ang kaso bangud supisyente ang ebidensya nga nakolekta sang mga imbestigador nga posible magresulta sa conviction sang mga respondent.
Ginpaathag naman sang abogado sang complainant nga ipadayunon nila ang kaso tubtob sa ulihi, kag suno diri, katuyuan sini nga mahatagan sang hustisya si “Totoy”.
Madumduman nga nagpadulong si “Totoy” sa NBI sang tinalikdan nga Enero agud ireklamo sanday Dee, Ramos, kag Panlilio bangud sa gina-alegar nga torture kag illegal detention.
Gin-akusaran naman si “Totoy” sang pagpangawat sang isa ka rolyo sang film nga may kaundan sang sensitibo nga mga litrato ni Dee.
