Dako ang pagnubo sang presyo sang live weight sang baboy sa probinsya sang Negros Occidental.
Sa interview sang Bombo Radyo Bacolod kay Alliance of Hog Raisers Association of Negros Occidental (AHRANO) President Pastor Ric Lauron, hinali nga nagpanaog ang presyo sa P155 tubtob P160 sa kada kilo sang buhi nga baboy.
Ini ang dako nga pagsarurot gikan sa tinalikdan nga P175 tubtob P180 kada kilo.
Suno kay Lauron, wala pa nila natumod ang rasun sang hinali nga pagnubo, samtang wala naman sila sang nakita nga pagbag-o sa presyo sang karne sang baboy nga ginabaligya sa merkado.
Aminado man si Lauron nga madamo sa karun sang supply kag nagnubo ang ila nga customer bangod ang mga sadto nagapamakal gikan sa Iloilo ang wala na nagbakal.
Suno diri, ang mga buyers sa Iloilo ang nagdesisyon nga sa Aklan kag Capiz na lamang mamakal bangod sa mas barato nga presyo.
Nagapati ini nga dako man ang kaangtanan sa pagbag-o sa presyo sang mga middle man.
Suno pa kay Lauron, tuman man ka barato sang pamakal sang mga local buyers, gani ini ang indi nila masaligan.
Samtang, may mga hog raisers man nga indi makabaligya sa buyers sa gwa sang Negros Occidental bangod wala sang Recognition of Active Surveillance (RAS) permit gikan sa Department of Agriculture.
Panugyan ni Lauron sa mga LGUs nga magkuha sang RAS permit para sa mas mahapos nga trade.
Sa karun, ginalibot kag ginamonitor ang hog population sa probinsya kag market prices, agud malakip sa ila plano nga paghinun-anon kag pagpangayo sang bulig sa Department of Agriculture.
