Ginakasubo sang commander sang 302nd Infantry Birgade nga nagpamalibad ang ginikanan sang isa ka NPA nga napatay sa engkwentro sa Cauayan nga kuhaon ang bangkay sang ila bata.
Sa lima ka NPA nga napatay, nalakip diri si Vince Francis Dingding, alyas Poy, nga amo ang deputy speaker sang Southeast Front kag political instructor nga residente sang Don Gil Garcia Extension, Capitol Site Poblacion, Cebu CIty.
Sa interview sang Bombo Radyo kay Brig. Gen. Jason Jumawan, commander sang 302nd Infantry Birgade, nagpadala sang sulat ang ginikanan ni Dingding gikan sa Cebu nga indi na nila pagkuhaon ang bangkay sini sa Negros Occidental.
Suno diri, bisan ang mga-utod ni Dingding indi man magbaton sang iya bangkay.
Suno kay Jumawan, naghambal ang amay nga mafocus na lamang sila sa pagpabulong sa iya asawa nga nagasuprer sang colon cancer.
Naghambal ang pamilya nga madugay na nila ginpapauli si Dingding bangod nakagradwar ini kag makabulig pa kun tani sa ila pagpangabuhi.
Apang, pahayag ni Juamawan nagahimo sila sang tikang nga matransport padulong sa Cebu ang bangkay ni Dingding kun mahimo nga magbag-o pa ang paminsaron sang pamilya sini.
Ginakasubo sini nga madamo sang pamilya ang naguba kag nauyang nga bwas damlag sang mga may potensyal nga mangin lider sa ulihi matapos magsulod sa NPA.
Si Dingding ginbun-ag sang Oktubre 10, 1995 kag nag-eskwela sa UP Cebu sang 2012 – 2015 kag naggradwar sa kurso nga Bachelor of Science in Computer Science (BSCS).
Tuig 2016 narecruit ini sang NPA kag humalin 2017, siya nangin full time member na sang rebelde nga grupo.
