Ginapangita na sang Department of Social Services and Development (DSSD) Bacolod ang iloy sang pito ka tuig nga babayi nga ginasakit sang iya amay.
Nagtrending sa social media ang video kun sa diin nakit-an ang amay nga ginhampak sang lipak ang ulo sang iya bata kag sang nagpungko ang bata, ginhampak ini sa tiil kag liwat nga ginhampak sa ulo.
Sa interview sang Bombo Radyo Bacolod kay Dr. Richelle Verdeprado-Mangga, head sang Bacolod DSSD, pasakaan sang kaso ang amay kag nakadetain sa Bacolod Police Station 1 samtang ang bata yara kustodiya sang DSSD.
Suno diri, ang iloy naga-edad sang 13 sang nagbusong kag ginbayaan sini ang bata sa amay samtang gina-alegar nga ang iloy may bag-o na nga kahagugma.
Suno kay Mangga, wala sang birth certificate kag baptismal kag wala naga-eskwela.
Sang ginrescue nila kahapon ang bata, nagasuksuk lamang ini sang tshirt sang iya amay, wala sang tsinelas kag nahibaloan nga nagapangayo-kayo sa public plaza.
Ila ginpakaon ang bata kag ipaidalom sa psycho medical treatment bangod indi lamang isa ka bes natabo nga ginsakit siya sang iya amay.
Matapos ang treatment, pangitaon sang DSSD ang pamilya sang iloy kag amay sang bata nga sarang magtatap kag kun wala sang may ma-atipan sa bata, ang DSSD ang makustodiya sa iya kag indi na siya pag-ibalik sa ginikanan. Samtang, Pasakaan sang kaso nga Republic Act No. 7610 ukon “Special Protection of Children Against Abuse, Exploitation and Discrimination Act” ang amay sang pito ka tuig nga babayi nga naghampak sang lipak sa ulo sang iya bata.
Sa interview sang Bombo Radyo Bacolod kay Police Captain Ma. Liberty Indiape, officer in charge sang Women and Children Protection Desk (WCPD) sang Bacolod City Police Office, ginaprocess na ang dokumento sa pagfile sang kaso batok sa amay samtang ginahibalo man ang detalye sa iloy sang bata.
Suno diri, sa karun safe na ang bata samtang yara sa kustodiya sang Department of Social Services and Development (DSSD).
Pahayag ni Indiape, may limitasyon ang pagdisiplina kag lain ang pagdisiplina nga indi husto ang pagsakit sa bata sangsa disiplina nga may yara sang pagpalangga.
