Apat ka ash emission ang narecord sa bulkan Kanlaon kahapon santo sa record sang Philippine Institute of Volcanology and Seismology (PHIVOLCS).
Sa interview sang Bombo Radyo Bacolod kay Engineer Mari Andylene Quintia, resident Volcanologist sang Kanlaon Volcano Observatory, kahapon may apat ka ash emission event nga nagluntad.
Suno diri, alas- 5:53 sang aga nag-umpisa sa pagbuga sang abo ang bulkan nga naglawig sa anum ka minutos kun sa diin nagdangat sa 800 meters ang kataason sang plume kag ini ginsundan sang isa pa gid ka ash emission event alas- 7:32 sang aga nga naglawig naman sa lima ka minutos kag ang plume height nagdangat sa 400 meters.
Samtang ang sunod naman natabo alas- 8:34 sang aga kun sa diin naglawig ini sa 13 minutos kag nagdangat sa 800 meters ang plume height.
Ulihi nga narecord nga ash emission nagluntad alas- 9: 13 sang aga nga naglawig tubtob sa 23 minutos apang wala na narekord ang plume height bangod natabonan na sang panganod ang ibabaw sang bulkan.
Suno kay Quintia, lima ang narekord nga volcanic earthquake lakip na ang duha ka volcanic tremors nga naglawig sa 3-9 minutos.
Pahayag sini, mataas sa gihapoan ang sulfur dioxide nga nagakarecord sa bulkan kag nagapabilin nga yara sa alert level 2 ang status sini.
