Ginpahayag sang abogado sa ciudad sang Bacolod nga mahimo mapasakaan sang tangkas-tangkas nga kaso ang nagahimo sang prank call.
Ini angot sa natabo kagab-i sang nagresponde ang Bacolod City Fire Station sa tawag nga may yara sang sunog sa Villa Angela Subdivision, Barangay Villamonte apang pag-abot sa area, wala sang sunog.
Samtang, nahibaloan man nga kahapon may anum ka food delivery rider nga gin-into man matapos magdul-ong sang order sa amo man nga address apang nagpahayag ang nagapanag-iya sang balay nga wala sila sang may ginpadeliver nga pagkaon.
Sa interview sang Bombo Radyo kay Atty Renecito Novero, ang prank call amo ang katontohan nga pagpanawag kag nagahatag sang tinonto nga impormasyon.
Suno diri, ang madakpan nga nagahimo sang prank call mahimo mapasakaan sang kaso nga unjust vexation, alarm and scandal, kag paglapas sa Cybercrime Prevention Act of 2012, kag Republic Act. 9514 ukon Fire Code of the Philippines of 2008.
Suno kay Novero, depende sa ginlapas sang indibidwal ang igadagdag nga penalidad apang mahimo ini magbayad sang penalty ukon mapreso.
Pahayag sini, para ma-trace ang number kag makuha ang identity sang nagtawag, mahimo nga magkoordinar sa telecommunications company, NBI, ukon DILG bangod may yara sila sang tracking system.
Mensahe sang abogado, may yara sang mga tawo nga ang kalipayan nila amo ang paghimo sang kinagamo apang dapat ikonsiderar kun ano ang halit nga matuga sini.
