Ginpahayag sang Education Program Supervisor in Social Studies ukon Araling Panlipunan sang Department of Education Division of Bacolod City nga tanan ang dapat mangin involved sa nagakatabo sa pungsod.
Sa interview sang Bombo Radyo Bacolod kay Pinky Pamela Guanzon, tanan ang kabahin sa problema, gani dapat tanan man ang mangin kabahin sang solusyon.
Si Guanzon ang madamo naman sang nalibot nga lugar sa pungsod, kag sa obserbasyon sini, madamo sa mga kabataan ang apisar nga proud sa ila identity bilang Pilipino, apang wala naman sang labot sa kun ano ang nagakatabo sa pungsod.
Gani panawagan sini sa mga kabataan nga mangin involved, panilagan kun ano ang nagakatabo sa pungsod, kag kun ano ang nagakatabo sa panggobyerno, agud indi mauyang ang nangin sakripisyo sang mga Pilipino sadto para mahatagan sang kahilwayan ang nagsunod nga mga henerasyon.
Pahanumdom ni Guanzon nga ang mga kabataan naman ang masunod nga henerasyon, gani karun pa lamang dapat nakahibalo na magpaminsar kun paano mangin kabahin sang solusyon.
Pahanumdom sini nga gustuhon man ukon indi, tanan kita ang kabahin kag naga-antos sa problema, gani dapat tanan man ang maghatag sang kontribusyon sa solusyon.
Suno kay Guanzon, ginapasanyog sa karun sang DepEd ang Social Studies classes.
Pahanumdom sini nga dapat nahibaluan sang mga kabataan ang history, kun sa diin nagsugod, agud mangin mas progresibo ang ila nga tukuron nga sosyodad sa palaabuton.
Gani importante man sa mga ini nga mangin matumtom samtang yara pa lamang sa mga eskwelahan.
