Patay ang isa ka manunudlo sa ciudad sang Bacolod matapos gina-alegar ginkastigo kag ginpainom sang muriatic acid kagab-i.
Sa impormasyon nga natipon sang Bombo News Team, ang manunudlo ang miyembro sang LGBTQ+ community, samtang estudyante naman ang suspect.
Gina-alegar nga nag-inom sang makahulubog nga ilimnon ang suspect sa puluy-an sang manunudlo antes matabo ang krimen.
May impormasyon nga nagadugsing lamang sang kastiguhanay ang manunudlo kag estudyante tubtob nga ini ang nangin matuod-tuod na.
Nabatian na lamang sang mga kaingod nga nagapangayo sang tabang ang manunudlo gani nagtawag sang kapulisan.
Bangod nakalock ang gate, naabtan sang kapulisan ang suspect, kag ini ang nakahunong na sa karun sa Bacolod Police Station 7.
Panindugan sang suspect nga siya ang gin-unahan pa-inom sang muriatic acid sang manunudlo.
Sa interview sang Bombo Radyo Bacolod kay RJ Paglumotan, Deputy Spokesperson sang Department of Education (DepEd) Division of Bacolod City, ginakasubo nila ang pagkamatay sang kaupod nga manunudlo, kag ginakondenar man nila ang krimen.
May impormasyon na ini tuhoy sa pangalan, edad, kag iban pa nga records sang biktima, apang indi sini mapalayag sa kahanginan sunod man sa request sang pamilya sa privacy.
Pahayag ni Paglumotan nga magapagwa man sang official statement ang DepEd-Bacolod tuhoy sa insidente.
Suno diri, ginpaidalom na sa medico legal ang biktima, samtang padayun man ang imbestigasyon sang kapulisan angot sa krimen.
