Pag-atake sang NPA sa mga kapulisan nga nagahatag security sa mga government employees sa Calatrava, ginalantaw nga pagtimalos angot sa Toboso encounter

Ginalantaw sang mga kapulisan nga pagtimalos ang motibo sa natabo nga engkwentro sa Sitio Kabalagnan, Brgy Lalong, Calatrava, Negros Occidental sang Domingo.

Sa interview sang Bombo Radyo Bacolod kay Police Captain Jesus Alba, Chief of Police sang Calatrava Municipal Police Station, mahimo pagtimalos sang rebelde nga grupo ang motibo sa nagluntad nga engkwentro bangud sa pagkapatay sang 19 ka mga rebelde sa banwa sang Toboso.

Suno kay Alba, kapin napulo nga mga miyembro sang New People’s Army ang nakaengkwentro sang personnel sang 1st Platoon, 2nd Maneuver Company sang Regional Mobile Force Battalion – Negros Island Region.

Pahayag sini nga apat ka uniformed personnel sang RMFB-NIR ang nag-convoy sa personnel sang Department of the Interior and Local Government (DILG) kag mga empleyado kag opisyales sang banwa sang Calatrava.

Wala naman sang nasamaran sa mga kapulisan kag mga government officials sa natabo nga engkwentro.