Plano nga padulongan kag ipatskeyar sang city administrator sang Bago City ang ginareklamo nga kanal sang irigasyon nga ginahaboyan sang basura sa Barangay Taloc, Bago City, Negros Occidental.
Sa interview sang Bombo Radyo kay Engr Edwin De Nicholas, kapin sa 200 ka pamilya ang ginsurvey nila nga apektado sang irrigation rehabilitation apang duha lang ang nagsaylo sa relocation site samtang ang mga nabilin naman ginstrikto nga maghalin sa right of way.
Suno diri, sadto ginatawag pa nila nga pinakamalaba nga CR ang kanal kag kun kaisa nagakapuno pa ang truck sang mahakot nga basura halin sa kanal nga sa tion sang patubod nagasulod na sa mga talamnan.
Suno kay De Nicholas, ginhambalan na sadto ang mga pumuluyo nga likawan na ang paghaboy sang basura sa kanal apang sa karun liwat na naman nila ini nga ginhimo kag ang problema wala lamang naga-eksister sa barangay Taloc apang apektado diri ang nga sakop sang Federation of Irrigators Association Central Negros Bago River Irrigation System (FIACN BRIS).
Pahayag sini, nakig-angot na sila sa barangay council sa barangay Taloc angot sa problema apang may mga pamulitika nga nagakatabo.
