Napasakaan na sang kaso ang 24- anyos nga lalaki nga nagpangsalisi gamit ang peke nga kwarta sa Bago City.
Suno kay Negros Occidental Police Provincial Office Spokesperson Police Captain Judesses Catalogo, napasakaan na sang kaso nga estafa kag paglapas sa RA 11235 ukon “Motorcycle Crime Prevention Act” ang suspek nga residente sang Barangay Napoles sa nasambit nga ciudad.
Nahibaloan nga nagpadulong ang lalaki sa isa ka tyangge kag naghambal nga mapacash in ini sang P10,000.
Wala anay ginsend sang nagabantay sang tyangge ang transaction kag ginhulat nga iduhol sang suspek ang kwarta apang ginapadali-dali ini sang lalaki nga ipasa na ang kwarta sa ginhatag niya nga number.
Natukiban nga play money ang pulo ka P1,000 bill nga gina-uyatan sang lalaki amo nga wala ginpadayon ang transaction.
Nagtuyo pa ang lalaki nga magsakay sa iya motorsiklo apang ginpunggan ini sang mga tawo kag ginpapanaog.
Nakita nga wala sang plaka ang motorsiklo kag ang plaka gintago niya sa iya likod kag gin-ipit sa iya short.
Natukiban man nga ang pangalan kag number nga tuyo kuntani sang lalaki nga pasahan sang skwarta amo ang iya kaugalingon bangod parehas ang pangalan sa bitbit sini nga ID.
Suno kay Catalogo, kalabanan sa mga ginabiktima sang ini nga pamaagi amo ang mga tigulang ukon mga kabataan kag maayo lamang nga ang biktima naka-intindi sang proseso kag nadakpan ang suspek.
