Imbes nga magcelebrate ang Canada bangod sa tuman ka dako nga goal difference sa paglutos sa Qatar sa Group B game sang FIFA World Cup 2026, ini ang nabayluhan sang kabalaka matapos makaangkon sang malala nga injury sa batiis ang ila player nga si Ismael Kone.
Wala gid ginpaporma sang Canada ang Qatar matapos nila ini gintambakal sang 6-0 goals, samtang duha naman ka player sang Qatar ang nahatagan sang red card.
Una nga nakagoal para sa Canada si Cyle Larin sa ika-16 minutis sang hampang.
Ini ang ginpasundan ni Jonathan David sa ika-29 minutos, nga wala pa nakontento kag nagdugang sang isa pa ka puntos sa three-minutes extension sa pagtakop sang 1st half.
Nakabatun naman sang red card si Homam Ahmed sang Qatar sa ika-33 minutos matapos sini nga ginfoul si Tajon Buchanan sang magtuyo kuntani nga makagoal para sa Canada.
Sa second half, ang kasadya sang Canada bangod sa 3-0 advantage ang nabayluhan sang kabalaka matapos maglubag ang tiil ni Ismael Kone.
Ini bangod sa pagtackle ni Assim Madibo sang Qatar sa ika-53 minutos sang hampang.
Sa kakibot sa natabo, gin-uyatan pa ni Kone ang iya nga batiis antes nagkapyot sa iya ulo bangod sa kasakit.
Matapos sang pagreview sa Video Assistant Referee (VAR), ginpasaka sa red card ang foul ni Madibo kag siya ang ginpagwa sa field.
Si Kone ang ginbuslan ni Nathan Saliba sa ika-56 minutos, nga gilayon man nga naka-goal makaligad gid lamang sang walo ka minutos, ukon sa ika-64 minutos sang hampang.
Ang 4-0 goals sang Canada ang nadugangan pa sang makakomiter sang own goal ukon aksidente nga napasulod ni Mohammed Manai sang Qatar ang bola sa goal sang Canada sa ika-75 minutos sang hampang.
Nagsaka sa 6-0 ang score sang magdugang sang puntos si David sa two-minutes extension sa pagtakop sang 90-minutes game.
