Kapin sa P2 million nga balor sang illicit cigarettes ang narekober sa isa ka warehouse sa Reclamation Area, Barangay 8, Bacolod City, kahapon alas- 3:00 sang hapon.
Sa interview sang Bombo Radyo kay Police Major Rhojn Darrell Nigos, head sang Criminal Investigation and Detection Group (CIDG) -Bacolod, apat ka persona ang naaresto nga nagpakilala nga manugbantay sang bodega sa raid nga ginpatigayon sang CIDG kag Bacolod Police Station 2 samtang nahimo naman sang tag-iya sang illicit ciagrettes nga makapalagyo antes pa man maka-abot ang kapulisan.
Ang mga naaresto amo sanday Eglen Laput Sr., 56-anyos, kag Eglen Laput Jr., 28-anyos, lunsay on call mechanic nga residente sang Dipolog City, Zamboanga del Norte; Drandreb Nelson, 39-anyos, helper mechanic, residente sang Zamboanga Sibugay; kag Rhea Pescador, 28-anyos, caretaker, residente sang Barangay Sum-ag, Bacolod City.
Suno kay Nigos, gintambakan sang ukay-ukay ang bodega agud matago ang mga illegal nga sigarilyo apang sang ginpangitaan sang permit ang warehouse wala sang may nahatag ang mga nadakpan.
Narecover ang 20 ka sako sang Native red cigarettes nga nagaunod sang 400 ka pakete kada isa kun sa diin nagdangat sa kapin P1,950,000 ang presyo sang illegal nga sigarilyo.
Sa karun padayon ang hot pursuit operation para madakpan ang nakapalagyo nga suspek nga nahibaloan nadakpan na sadto sa kaso nga pagbaligya sang illegal nga droga kag sang nakagwa sa presohan, ini ang nagsulod sa gihapon sa illegal nga buluhaton.
