Ginsuspender ang klase sa ciudad sang Bacolod halin Kinder Garten tubtob Senior High School (Public and Private) bangod sa segi-segi nga pagbubo sang ulan.
Sa interview sang Bombo Radyo Bacolod kay Mayor Greg Gasataya, halin pa kagab-i ang ila monitoring sa tiyempo kun sa diin namonitor ang mabaskog nga ulan alas-2:00 tubtob alas-3:00 sang kaagahon.
Apang ginhulat pa nila nga makapagwa sang Weather Forecast ang Philippine Atmospheric, Geophysical and Astronomical Services Administration (PAGASA) agud may-ara sang klaro nga basihan sa pagpagwa sang executive order nga nagasuspender sang klase.
Ginpagwa nila ang announcement alas-5:25 sang aga.
Suno kay Mayor Greg, Kinder tubtob Senior High School lamang ang klase nga ginsuspender bangod bag-o lamang nagtakop ang mga klase sa kolehiyo.
Paathag sini nga ginatinguhaan man nila nga mapadasig ang announcement, apang kinahanglan nga ma-assess ang sitwasyon agud indi madelay ang pagtuon sang kabataan, apang mas labi nga prayoridad gihapon ang safety sang mga ini.
