Ginklaro sang Bacolod City Engineers Office nga wala nagkulang ang ciduad sa pag-monitor sang re-development project sang Tourism Infrastructure and Enterprise Zone Authority (TIEZA) sa Bacolod Public Plaza kag Bacolod City Government Center Fountain.
Madumduman nga santo sa sabat sang TIEZA sa ginpadala nga sulat ni Mayor Greg Gasataya, ginpahayag nila nga na-delay ang proyekto bangud sa pila ka mga reviews kag approval sang mga technical revisions nga gin-request sang ciudad sang Bacolod.
Ginpanginwala naman ni Engr. Loben Seballos, Head sang City Engineers Office ang alegasyon nga wala sila nagamonitor sa proyekto sang TIEZA sa duha ka areas.
Suno kay Seballos, halin pa sa una nga preparasyon sang proyekto, nagakoordinar kag nagabulig na sila sa TIEZA.
Dugang pa, may yara sila sang coordinating team nga ginalakipan sang mga architects, electrical, mechanical kag structural engineers nga regular nga nagakoordinar sa TIEZA kag sa kontraktor.
Paathag sini nga kun may pila ka mga concerns ang ciudad kaangay sang mga designs, ginpahibalo gid nila ini sa TIEZA.
Ini bangud suno diri, ginpasiguro nila nga insakto gid ang mga disenyo antes pag-ubrahon bangud mabudlay kun magliwat-liwat pa nga suno sa iya, makatuga sang usik sa materials, manpower kag oras.
Aminado ini nga may pagdelay sa proyekto bangud sa board ups kag pagrepair sa mga naguba sang bagyo.
Apang, ginpaathag ni Seballos nga wala nagalabay sa approval sang ciudad ang tanan nga pondo nga gina request sang TIEZA sa national government.
Ini bangud suno sa iya, nakadepende gid sa TIEZA ang paghatag sang time extension kag evaluation sang additional cost kag nagabase lamang ang ciudad sa assessment sang mga engineer sang TIEZA.
Samtang, nagpatigayon sang public meeting si Bacolod City Mayor Greg Gasataya upod ang TIEZA kahapon.
Ginhingyo sang Alkalde nga ipresentar ang tanan nga dokumento sa re-development project sini sa Bacolod Public Plaza kag BCGC Fountain kaangay sang Program of Works kag Bill of Quantities.
Nagpasalig ang TIEZA nga ibalik ang original greenery kag iconic checkered flooring sang plaza nga naapektuhan sang ila rehabilitation
Padayon naman nga nagpanindugan si Mayor Greg nga indi pagbaton ang proyekto kun wala pa ini natapos kag nakay-o.
