Madinalag-on na nga nabalik sa tag-iya ang laptop nga nabilin sa taxi, matapos personal nga gindul-ong sang taxi driver sa estasyon sang Bombo Radyo Bacolod.
Nahibaluan nga nagdangop sa Hot Panawagan sang Bombo Radyo Bacolod si Eva Eustace sang Hunyo 17 matapos ginpahayag nga nabilin sa taxi ang iya laptop bag nga naga-unod sang laptop, phone charger, bible, notebook, kag eyeglass.
Subong nga adlaw, nagsaka man sa estasyon ang taxi driver nga si Decederio Galapin.
Suno sa iya, duha ang magkaupod nga gindul-ong niya sang amo nga tion gikan sa Panaad padulong sa North Terminal nga nagpahayag magapadulong sa Cadiz City.
Siya ang nagtaya sa North Terminal, apang sang may bag-o nga nagsakay ginpahayag sini nga may nabilin nga bag.
Suno kay Galapin, wala ini sang nakita nga pangalan gani nagalibog ang ulo niya kun paano ma-uli.
Gani ginadala-dala sini sa pagbyahe ang laptop bag sa paglaom nga may-ara sang magapangita.
Suno sa iya, may kaupdanan ini nga taxi driver nga naghambal nga may ginapanawagan sa Bombo Radyo ang taxi nga nabilinan sang iya laptop.
Gindul-ong sini ang laptop subong nga adlaw nga gilayon man nga naclaim sang tag-iya.
Pahayag ni Galapin nga apisar nga mahina ang kita sa taxi, kag sa tuman nga kapigaduhon, wala gid sini gintandog ang mga unod sang laptop bag sa panindugan nga ini ang indi iya.
Suno sa iya, nadula na ang palaligban sini karun nga nabalik na ang laptop.
Samtang, dako ang kalipay sang religious missionary matapos mabalik paagi sa Bombo Radyo Bacolod ang nadula sini nga laptop bag, nga naga-unod sang laptop, bible, phone charger, notebook, kag eyeglass.
Nahibaluan nga sang Hunyo 17 gindangop ni Eva Eustace, 60 anyos, sa Hot Panawagan ang pagkabilin sang iya laptop bag sa taxi sang Hunyo 16.
Ini ang gindul-ong naman sang taxi driver nga si Decederio Galapin matapos nga may nakasugid sa iya natuhoy sa panawagan.
Suno kay Eustace, siya ang tumandok sang Sagay, apang 21 anyos pa lamang sang nagsaylo sa Australia kag kapin 25 ka tuig nga nagtinir sa nasambit nga pungsod.
Didto man ini nakapamana, kag sila ang may duha ka kabataan, apang sang damlag lang ginbawi na sang Ginoo ang iya bana.
Sa suporta sang Northern Terittory Multi-National Christianity, siya ang nagbalik sa Negros para sa religious mission, kun sa diin makabig sini nga lifeline ang mga unod sang laptop bag.
Pahayag ni Eustace nga yara tanan sa laptop ang iya gina-preaching kag ang iya ministry ang nahanungod sa love, hope, and healing.
Dala-dala sini ang laptop sa paglibot sa Sagay City kag Cadiz City gani dako ang epekto sa iya sang ini ang madula, tubtob nga may nagrefer nga siya ang magpa-Bombo.
Nagkadto man ini sa Panaad kun sa diin naksakay sa taxi, apang wala gid makita ang driver.
Gani dako ang pasalamat niya nga nabalik ang laptop, kag wala gid bisan isa nga nadula sa iya mga pagkabutang.
