Nagpaandam ang United Nations (UN) nga mahimo maglab-ot sa $3.6 billion ang mangin epekto sang Ebola outbreak sa ekonomiya sang Africa sa diin ginabanta kapin 328,000 ka mga trabaho ang madula kun indi gilayon matapna ang paglapta sang balatian.
Santo sa UN, ang ‘Bundibugyo strain’ sang Ebola ang mahimo magresulta sa isa ka lapnagon nga krisis kag sa karon, wala pa ini gihapon sang aprubado nga bakuna.
Sa record sang Democratic Republic of Congo, nagdangat na sa 1,307 ka indibidwal ang nahawaan sang virus kag 377 naman ang ginbawian sang kabuhi humalin sang gindeklarar ang outbreak sang Mayo 15.
May yara naman sang kaso sa Uganda, samtang nagpaandam ang mga eksperto nga mahimo maglapta pa ang virus sa mga kaingod nga pungsod kaangay sang South Sudan.
Base sa senaryo nga ginplastar sang UNDP, ginabanta maglab-ot lamang sa $1 billion ang mangin halit sa gross domestic product (GDP) sang Congo kun mapabilin nga kontrolado ang outbreak sa Congo kag Uganda.
Apang kun maglapta ang Ebola sa iban nga pungsod partikular sa Rwanda kag Angola kag magdungan man ang pagsaka sang presyo sang langis tuga sang krisis sa Iran, mahimo magresulta sa $3.6 billion ang economic loss sang Africa.
