Nabutang sa ital-ital, apang natigayon nga madaog sang defending champion nga Argentina ang hampang batok sa first timer nga Cabo Verde sa Round of 32 sang FIFA World Cup 2026.
Ang hampang ang nagtakop sa score nga 3-2 matapos sang time extension.
Una nga nakagoal si Argentina Superstar Lionel Messi sa ika-29 minutos sang first half.
Natapos ang 1st half nga wala na sang dugang nga nakagoal.
Sa 2nd half, una naman nga nagpasulod sang goal si Deroy Duarte sa ika-59 minutos sang hampang.
Ang score ang nagpabilin sa 1 all tubtob nga natapos ang 90 minutes game.
Bangod sa patas nga score, ginhatagan sang duha ka 15 minutes extra time ang duha ka team bilang tie breaker.
Didto na kag nakapasulod sang ikaduha nga goal si Lisandro Martinez para sa Argentina sa ika-92 minutos sang hampang.
Apang napatas liwat sang Cabo Verde and score sa pagpasulod ni Sidny Lopes Cabral sa ika-103 minutos sang hampang.
Kun nagpabilin nga patas sa 2-all ang hampang, ini kuntani ang magadangat sa penalty shootout kun sa diin hatagan sang tig-lima ka penalty shots ang kada team agud mabal-an ang winner.
Apang antes paman matapos ang extra time, aksidente nga nakahimo sang own goal si Diney sang Cabo Verde ukon napasulod sini ang bola sa goal sang Argentina sa ika-111 minutos sang hampang.
Gani nagtakop sa 3-2 ang score pabor sa Argentina, nga amo ang magahampang sa Round of 16.
Ang Round of 16 ang maga-umpisa na bwas, Hulyo 5, 2026.
