Ginkakibot sang isa ka doktor sa ciudad sang Bacolod nga gingamit ang iya pangalan sa medical certificate nga gingamit sang mga tawo para makakuha sang ayuda sa Department of Social Welfare and Development (DSWD).
Sa interview sang Bombo Radyo kay Dr. Christian Bayoneta, sang Hulyo 1 may nagpadulong nga DSWD personnel sa iya clinic kag nagpahayag nga urgent ang ila concern.
Suno diri, ginpahibalo siya nga madamo sang nagpasa sang medical certificate gamit ang iya pangalan kag iya gin-verify nga iban sa mga naggamit sang iya pangalan wala sa patient record nila sa clinic.
Nakita sini ang medical certificate kag lain ang nabutang nga logo, watermark, contact details kag perma apang ang iya pangalan, license number kag pangalan sang iya clinic ang insakto.
Pahayag ni Bayoneta, madamo sang pasyente ang may lehitimo nga may sakit kag ini ginabuligan sa paghimo sang reseta kag request para makakuha sang medical assistance apang ang malain lamang diri nga ginagamit sa indi husto ang ayuda para makapangkwarta lamang.
