Kasunod sang pagsaulog sang ika-60 nga anibersaryo sang Bombo Radyo Philippines, ginahatagan sang bug-os nga network sang mataas nga pagpasidungog si Dr. Rogelio M. Florete, Chairman sang Florete Group of Companies.
Sa idalom sang iya pagpamuno, ang Bombo Radyo Philippines nangin pinakamalig-on kag pinakasaligan nga broadcasting institution sa Pilipinas.
Ginpalapad niya ang operasyon sang network, ginpadasig ang modernisasyon sang mga estasyon, kag ginpabakod ang kultura sang propesyonalismo, integridad, kag matuod nga serbisyo publiko.
Ang iya prinsipyo nga “Truth is non-negotiable and excellence is the benchmark”; ang nangin giya sang linibo ka mga mamamahayag, broadcasters, kag mga empleyado sang Bombo Radyo sa ila adlaw-adlaw nga pagpangabudlay.
Paagi sa sini nga prinsipyo, padayon nga ginapalig-on sang network ang balanse nga komentaryo, patas nga pagbalita, kag responsable nga pamamahayag.
Sa iya pagpamuno, wala lamang naglapad ang sakop sang Bombo Radyo sa bug-os nga pungsod, kundi mas nagbakod man ang pagsalig sang publiko sa network bilang nagapanguna nga ginakuhaan sang balita kag impormasyon.
Bangud sang iya talagsaon nga kontribusyon sa industriya sang media kag negosyo, gindayaw si Dr. Florete bilang Lifetime Achievement Awardee sang Kapisanan ng mga Brodkaster ng Pilipinas (KBP), Captain of Industry in Media sang Philippine Chamber of Commerce and Industry–Western Visayas, kag nakabaton man sang madamo pa nga prestihiyoso nga pagkilala lakip ang Ninoy Aquino Award for Nationalism, Golden Salakot Award, Diamond Lifetime Achievement Award for Mass Media, Dungog sang Iloilo Award, kag Business Icon in the Visayas.
Madamo gid nga salamat, Dr. Rogelio M. Florete.
Paagi sa inyo pagpamuno, ang Bombo Radyo nangin labaw pa sa isa ka broadcasting network.
Nangin isa ini ka institusyon nga pinaka-ginasaligan sang pumuluyong Pilipino—isa ka puluy-an sang kamatuoran kag matuod nga serbisyo publiko.
