Gin-anunsyo sang Bureau of Internal Revenue (BIR) nga opisyal na nga ginbalik ang koleksyon sang excise tax sa liquified petroleum gas (LPG) kag kerosene nga nag-umpisa kahapon, Hulyo 8.
Madumduman nga temporaryo nga ginsuspende ang nasambit nga buwis sadtong Abril agud mabuhinan ang dugang nga galastuhan sang mga Pilipino samtang nagasaka kag nagabag-o bag-o ang presyo sang langis sa global market tuga sang tensyon sa Middle East.
Apang, bangud nagpanaug na sa $79.45 kada bariles ang average nga presyo sang Dubai crude oil sang Hunyo, mas nubo sangsa $80 kada bariles nga threshold sa idalom sang Executive Order No. 114-2026, automatic nga ginbalik ang excise tax nga indi na kinahanglan sang panibag-o nga EO.
Bangud sini, liwat na nga ipatuman ang buwis nga P3.00 kada kilo para sa LPG kag P5.00 naman kada litro para sa kerosene, sa idalom sang TRAIN Law kag National Internal Revenue Code.
Santo sa BIR, nakabase ang liwat nga pagpatuman sang buwis sa sertipikasyon sang Department of Energy (DOE) nga nagpanaug na ang presyo sang langis, gani natuman ang kondisyon agud tapuson na ang temporaryo nga tax suspension.
