Padayon nga ginamonitor ang Bagyong Inday subong nga Sabado kun sa diin ang mata sang bagyo ang ulihi nasiplatan sa 500 km Northeast sang Itbayat, Batanes, nga may kabaskugon sang hangin nga 140 km/h malapit sa sentro kag may pagmadlos nga 170 km/h.
Ini ang nagahulag sang 20 km/h sa Northwestward nga direksyon.
Nakapaidalom gihapon sa Tropical Cyclone Wind Signal no. 2 sa naaminhan nga bahin sang Batanes (Itbayat).
Samtang, signal no. 1 naman sa nabilin nga bahin sang Batanes, Babuyan Islands, kag northern portion sang mainland Cagayan.
Lauman nga maga-gwa na ang bagyo sa Philippine Area of Responsibility sini nga aga.
Padayon naman nga nagaapekto ang Southwest monsoon ukon habagat sa Central kag Southern Luzon, Visayas, kag Mindanao.
Lauman ang mabulubagyuhon nga panahon sa Batanes tuga sang Tropical Cyclone Inday.
Ginaabisohan ang publiko sa posible nga pagbaha kag landslide tuga sang madamol nga pag-ulan.
Samtang, maeksperyensyahan naman ang pag-ulan kag pagmadlos sang hangin sa Cagayan tuga gihapon sang Tropical Cyclone Inday.
Lauman ang tumalagsahon nga pag-ulan sa Metro Manila, MIMAROPA, Western Visayas, Negros Island Region, La Union, Pangasinan, Benguet, Zambales, Bataan, Cavite, kag Batangas dala naman sang habagat.
Maeksperyensyahan ang lapta-lapta nga pag-ulan sa nabilin nga bahin sang Cordillera Administrative Region, Ilocos Norte, Ilocos Sur, kag Isabela dala sang bagyong Inday.
Lauman man ang lapta-lapta nga pag-ulan sa Zamboanga Peninsula, BARMM, SOCCSKSARGEN, nabilin nga bahin sang Luzon kag Visayas tuga sang habagat, samtang sa nabilin nga bahin sang Mindanao, maeksperyensyahan ang pugtak-pugtak nga pag-ulan dala sang habagat.
