Gin-ako sang New People’s Army (NPA) ang pagpatay sa duha ka mga lalaki sa Sitio Cinco, Barangay Gawahon, Victorias City, Negros Occidental sang Biyernes, Hulyo 10, 2026.
Ginkilala ang mga napatay nga biktima nga sanday Jerome Seballos kag Alex Cunanan.
Base sa ginpagwa nga statement sang Roselyn Jean Pelle Command kag Apolinario Gatmaitan Command, ginpatay sang mga ini si Seballos bangud gina-alegar espiya sang militar samtang si Cunanan naman ang nagtraidor sa ila sa hublag.
Dugang pa sang NPA, nakuha kay Seballos ang kalibre 45 nga armas kag shotgun samtang kalibre 45 naman nga armas ang nakuha kay Cunanan.
Sa report sang NPA, imbolbado si Seballos sa “Toboso 19 ” sadtong Abril 19, 2026 samtang si Cunanan ang nagtudlo sa mga militar sa nagluntad nga operasyon sa Barangay Gawahon, siudad sang Victorias kag sa Barangay San Isidro, banwa sang EB Magalona.
Base man sa record sang NPA, ginatudlo nga responsable si Seballos sa pag-abduct kag pagpatay kanday Nonoy “Ka Jojo” Ponteras kag Marissa “Ka Renz” Pobresa sadtong 2024 samtang si Cunanan ang nanumpa bilang ila miyembro sang 1980.
Si Seballos ang nakuhaan man sang armas-luthang sang ini ang nadakpan kaupod ang siyam ka iban pa sang Criminal Investigation and Detection Group sa Talisay City apang nakagwa matapos makapiyansa.
Samtang sa interview sang Bombo Radyo Bacolod kay Police Lt Col. Terrence Paul Sta. Ana, Chief of Police sang Victorias City Police Station, ginahibalo pa ang identity sang pito ka mga persona nga nagtiro-patay sa duha kanday Jerome Seballos kag Alex Cunanan sa Sitio Gawahon, Barangay 11, Victorias City.
Suno kay Sta. Ana, apisar nga indi man ang pito ang nagtiro-patay sa duha ka biktima apang sila ang ginakonsiderar nga kaupod sa paghimo sang krimen bangud sila ang isa ka grupo.
Suno diri, murder naman ang kaso nga ipasaka sa pito ka mga persons of interests sa pagpatay sa duha.
