Kun ikaw ang nagaisahanon kag wala sang kaupod nga mag-barbecue, may yara subong sang serbisyo kun sa diin ikaw ang maka-renta sang “barbecue companion” ukon temporaryo nga kaupod sa ihawan.
Sa balor nga 1,000 tubtob 5,000 rubles ukon P800-P4,000 kada adlaw, may kaupod kana sa pag-ihaw kag pag-inom sang beer.
Ini ang nakakuha sang atensyon sa Russia sa tumalagsahon sini nga serbisyo sa diin madamo na sang nagalapta nga advertisement sa nagkalain-lain nga platforms.
Suno sa ads, handa sila nga updan ang ila kliyente sa pag-ihaw sang karne, magpatindog sang tent, kag makig-istorya ukon maghatag sang jokes.
Apang ini ang para lamang sa mga lalaki, kag maathag nga ginabayaran ang pag-updanay.
Indi man dapat paglauman nga magpabilin ang pag-inabyanay matapos ang serbisyo, kag kun luyag nga maglawig ang pag-istoryahanay, kinahanglan magbayad sang dugang.
Base sa datos, bantog ang ini nga serbisyo sa Moscow, Krasnodar Krai, kag Nizhny Novgorod.
Suno naman sa isa ka Russian restaurateur, apisar indi mabakal sang kwarta ang matuod-tuod nga pag-abyanay, ang ini nga sahi sang serbisyo ang mahimo magserbe bilang paagi nga mangin malipayon ang isa ka gab-i sang isa ka tawo kag isa ka kahigayunan nga makakilala sang iban nga mga persona.
